Nám & starf í Regnboganum

Við viljum skapa barnvænt umhverfi, rækta tillitsemi, vináttu og kærleika og stuðla þannig að góðum samskiptum milli barna sem og barna og fullorðinna. Við viljum sýna börnum virðingu, gleði og umhyggju svo þau læri sjálfsvirðingu. Við leggjum áherslu á skapandi samskipti svo börnin öðlist færni til að koma skoðunum sínum á framfæri og læri að virða skoðanir annarra. Við leggjum áherslu á réttlæti og samhygð barnanna svo þau öðlist innri aga og læri tillitsemi og réttsýni gagnvart hvert öðru. Við leggjum áherslu á  hvatningu og að hrósa fyrir gott framtak og gott fordæmi svo börnin gefist síður upp þó á móti blási.  Við viljum vera til staðar og hjálpa barni að skilja tilfinningar sínar í reiði, sorg, áræði og gleði. Í daglegu starfi leggjum við því rækt við léttleika og gleði til að læra að taka sig ekki of alvarlega en um leið reynum við að skapa andrúm og festu þar sem börnin tileinka sér daglegar umgengnisreglur og almenna mannasiði.  Virðing og festa í daglegum ramma þar sem réttlátar reglur gilda stuðla að sjálfsstjórn barnsins, innri aga og ró. Allt er þetta hluti af tilfinningalega styðjandi umhverfi.

​Til að börn geti þróað með sér skapandi hugsun þarf að skapa börnum frjótt og vel skipulagt barnvænt leikumhverfi (inni og úti) sem hvetur til fjölbreyttra leikja og uppgötvana barnanna. Efniviður og aðstæður eiga að hvetja til könnunar og rannsókna á hlutum og fyrirbærum í daglegu lífi okkar, náttúrunni og umhverfinu. Starfið á að vera börnunum hvatning til að tjá sig á fjölbreyttan og skapandi hátt s.s. í máli, leik, tónlist og myndíð. Við leggjum áherslu á að gera starf barnanna sýnilegt með teikningum þeirra, ljósmyndum og skráningum á því sem þau segja og gera.  Aðalatriðið í sköpun er ferlið sjálft og sú samræða sem börnin fara í gegnum í daglegu starfi, uppgötva og nema í starfinu og sem fleytir þeim áfram í þroska.  Við viljum virða og taka tillit til getu barnsins og löngunar eins og hún birtist á hverjum tíma og leggja okkar af mörkum til að skapa kjöraðstæður einmitt á þeim tíma sem barnið er tilbúið til að skoða/rannsaka, taka á móti og nema.

Við viljum stuðla að skapandi tjáningu og virkri hlustun  í daglegu starfi og rækta þannig móðurmálið okkar.  Börn þurfa þjálfun í hlustun, tjáningu og góðar  fyrirmyndir heima og í  leikskólanum til að öðlast góðan og fjölbreyttan orðaforða.  Grunnurinn að góðum málþroska hefst með fyrsta hjali foreldra við barn sitt.  Öll málreynsla sem á eftir kemur skiptir miklu fyrir mál- og lesþroska barnsins, nú kallað læsi í námsskrám. Í Regnboganum byrjum við strax meðvitað á  Gulu deildinni að vinna að eflingu mál- og lesþroska og gerum ritmálið sýnilegt og eðlilegt í umhverfinu. Börnin leika sér að  hljóða stafinn sinn og síðar stafinn hennar mömmu, hans pabba, afa og ömmu, dýranna o.s.fr.  Smám saman ná börn færni með hljóð allra stafanna og að skilja að hver stafur er tákn um málhljóð. Hljóð sem hægt er að leika með og tengja saman í orð og hugtök. Samræður, sögur, söngur og  söngtexti veita barni góða þjálfun í að æfa málið og nota það. Allt stuðlar þetta svo að heilbrigðri hljóðkerfisvitund barnanna og byggir undirstöður fyrir mál þeirra og lesþroska. Við gerum ritmálið sýnilegt á öllum deildum barnanna og stuðlum þannig að tengslum ritmáls og leiks. Smám saman læra börnin að hljóða stafina og þekkja, að ríma, klappa takt/atkvæði í orði, tengja stafina saman í merkingarbær orð t.d. nafnið sitt og sinna, að para saman hljóð og sundurgreina hljóð og o.fl.  Allir þessir þættir eru mikilvægir fyrir þróun  hljóðkerfisvitundar og í þróun máls- og lesþroska barnanna.  Mál- og lesþroski er í  Aðalnámskrám Mrn. frá 2011 nefnt LÆSI. Læsi í aðalnámskrám á líka við um það að vera læs á samskipti, náttúruna, menningu okkar og umhverfi svo eitthvað sé nefnt eða Læsi í sinni víðustu mynd.

Við viljum styðja við og efla stærðfræðilegt læsi barna í gegnum leik. Það gerum við m.a. með því að vekja athygli barnanna á stærðfræði í umhverfinu s.s. á fjölda  (1, 2, 3, 4 og 5 steinar), stærð (lítill, stór, stærri, minni o.s.fr.), lögun (s.s. stuttur, langur o.s.fr.) magnhugtök (s.s. fáir, margir, meira og minna o.s.fr.), eðli hluta (s.s. léttur og þungur o.fl.). Börnin læra um helstu formin og reyna að finna þau í umhverfinu s.s. ferning, þríhyrning og hring. Þá æfa börnin sig í að telja og skilja hvað stendur á bak við fjölda (talnaskilningur), læra að flokka, para saman og sundurgreina. Eldri börnin æfa sig í að gera súlurit  (3 eru í gulum peysum, 2 í rauðum, 5 í bláum o.s.fr. ), æfa burðarþol og ýmsa verkfræðilega hugsun í leik. Vakin er athygli barnanna á litum, formi og magni allt  í kringum okkur. Allt stuðlar þetta að dýpri stærðfræðilegum skilningi þegar í formlegra nám er komið á efri skólastigum.